Мектеп табалдырығын аттағаннан-ақ көзіңізге оттай басылатын жандар болады. Олар – айналасына шуақ шашып, әрбір шәкіртінің тағдырына бейжай қарамайтын, өз ісінің нағыз шеберлері. Біз бүгін заманауи технология тілін меңгеріп қана қоймай, сол білімді ұлттық тәрбиемен ұштастыра білген аяулы ұстаз, информатика пәнінің мұғалімі Ағманова Зұлпия Ерікқызының жұмыс бөлмесіне бас сұққан едік.
Зұлпия Ерікқызының жүзінен сабырлылық пен парасаттылық аңғарылады. 1989 жылы Жаңақорған кентінде дүниеге келген ол – туған жердің төл перзенті. Оның өмір жолы туған өлкеге деген шексіз сүйіспеншіліктен бастау алған.
С.Сапарбеков атындағы №125 орта мектепті тәмамдап, Қорқыт ата атындағы Қызылорда мемлекеттік университеті мен Қожа Ахмет Ясауи атындағы Халықаралық қазақ-түрік университетінде білімін шыңдаған магистр ұстаз бүгінде өзі білім алған алтын ұяда еңбек етуде.
– Өз мектебіңе мұғалім болып оралу – үлкен жауапкершілік, – дейді ол жылы жымиып.
Шынында да, 2013 жылдан бері информатика пәнінен дәріс беріп келе жатқан Зұлпия Ерікқызының әр сабағы шәкірттері үшін жаңалыққа толы қызықты саяхат іспетті.
Шәкірт жетістігі – ұстаз мерейі
Ұстаздың деңгейі шәкіртінің жеткен биігімен өлшенеді. Кейіпкеріміздің шәкірттері туралы сөз қозғағанда жанарынан ерекше мақтаныш сезімі байқалады. Оның тәлімін алған оқушылар бүгінде түрлі деңгейдегі білім бәйгелерінде топ жарып жүр.
Олимпиада шыңдары
2024 жылы Мұстафа Нұрдәулет «Ауыл олимпиадасында» жүлдегер атанса, 2025 жылы Әбусейтова Саида аудандық кезеңде І дәрежелі диплом иеленіп, ұстаз сенімін ақтады.
Шығармашылық серпін
«Мамандықтар әлемін ашамыз» форумында Әбутәліп Балнұр мен Сәулетбек Ұлжалғас жүлделі орындарға ие болды. Ал биыл Айтуар Динараның презентация байқауындағы жеңісі Зұлпия Ерікқызы еңбегінің жемісті екенін тағы бір мәрте дәлелдеді.
Ұстаздың жұмыс үстеліндегі дипломдар мен алғыс хаттар – жай ғана қағаз емес. Олар – ұйқысыз түндер мен төгілген тердің, шәкіртке деген шексіз сенім мен қажырлы еңбектің айғағы.
«Эверестті» бағындырған ізденіс
Зұлпия Ерікқызы тек компьютер алдында отыратын маман емес. Ол – қоғамдық жұмыстардың бел ортасында жүретін, ойы ұшқыр, сөзі салмақты тұлға.
2024 жылы «Педагогикалық идеялар аукционы» байқауында өзінің креативті әдістемесімен үздік атанса, 2026 жылы мемлекет және қоғам қайраткері Бердібек Сапарбаевтың құрметіне арналған пікірсайыс турнирінде «Эверест» фракциясы құрамында ІІ орын иеленді. Бұл оның шешендік қабілеті мен жан-жақты ізденісін көрсетеді.
«Ұстаздық еткен жалықпас, үйретуден балаға» деген Абайдың тағылымды сөзін өмірлік ұстанымына айналдырған Зұлпия Ерікқызы цифрлы дәуірдің алгоритмдерін түсіндіре отырып, шәкірт жүрегіне адамгершілік құндылықтарды сіңіре білетін білікті педагогтардың бірі.
Түйін
Біз мектептен аттанып бара жатып, тағы бір мәрте артымызға бұрылдық. Зұлпия Ерікқызы тақта алдында кезекті алгоритмді түсіндіріп тұр. Оның айналасына жиналған оқушылардың жанарындағы жалын – ұстаз берген білім мен тәрбиенің, мейірім мен қамқорлықтың көрінісі.
Иә, мұндай парасатты ұстазы бар елдің ертеңі жарқын, шәкірті биік болмақ.
Жансая НҰРҚОЖА
Қызылорда облысы,
Жаңақорған ауданы