«Ұстаздың қолында – адамзаттың болашағы, елдің ертеңі».
Мектеп… Осы бір қасиетті шаңырақтың табалдырығын аттаған сайын ерекше бір жылылық сезіледі. Қоңырау үнімен бірге бала арманы қанат қағып, білімнің шамы жанады. Ал сол шамды маздатып, шәкірт жүрегіне үміт пен сенім ұялатып жүрген жандар – ұстаздар. Ұстаз деген – бір қолымен бүгінді, бір қолымен болашақты жалғап тұрған алтын көпір.
Осындай жүрегі мейірімге, жан дүниесі білімге толы жандардың бірі – Қызылорда облысы, Шиелі ауданындағы «№219 Ы.Алтынсарин атындағы орта мектебі» коммуналдық мемлекеттік мекемесінің тарих және география пәндерінің мұғалімі, педагог-зерттеуші Мұхамеджанқызы Айнұр.
Айнұрдың ұстаздық жолы – жай ғана еңбек жолы емес, ұлттың ертеңіне қызмет ету жолы. Ол тарихты оқытқанда өткеннің өнегесін бүгінмен сабақтастырады, географияны түсіндіргенде әлемнің кеңдігін ғана емес, туған жердің қадірін де шәкірт санасына сіңіреді. Әр сабағында құрғақ дерек емес, елге деген сүйіспеншілік, туған жерге деген құрмет, адамзатқа деген жауапкершілік қатар өріліп жатады.
Мектеп дәлізінде асықпай жүретін, жүзінен әрдайым мейірім төгіліп тұратын осы қарапайым жанды алғаш көрген адам оның бойындағы үлкен тұлғаны бірден аңғара бермеуі мүмкін. Бірақ уақыт өте келе оның сабырлы мінезінің астарында қажырлы еңбек, тынымсыз ізденіс, ұстаздыққа деген адалдық жатқанын түсінесіз.
Жиырма жылдан астам уақыт ішінде қаншама шәкірттің тағдырына сәуле түсірді. Біреуіне білімнің кілтін ұстатты, біреуінің арманына қанат бітірді, енді бірі үшін өмірлік бағыт-бағдар бола білді. Ұстаз үшін ең үлкен бақыт – шәкіртінің жетістігі. Сондықтан әрбір жеңіс оның өз қуанышындай қабылданады.
Оның тәрбиелеген шәкірттері аудандық, облыстық, республикалық олимпиадаларда үздік нәтиже көрсетіп келеді. «Ақбота» республикалық зияткерлік олимпиадасында Төлеген Айдаулеттің жүлдегер атануы, аудандық пәндік олимпиадада Мэлсов Аңсардың ІІ орын алуы, кейінгі жылдары Хамитұлы Думанның, Тоқберген Кәусардың, Тоқсанбаев Арысұланның республикалық юниорлық олимпиадаларда жүлдеге ілігуі – ұзақ жылғы еңбектің нақты нәтижесі.
Бұл жеңістердің әрқайсысының артында түн ұйқысын төрт бөліп дайындалған сабақтар, қосымша ізденістер, жүздеген кеңестер мен мыңдаған үміт жатыр. Жеңіс тұғырына көтерілген шәкірттің жүзіндегі қуаныш – ұстаздың маңдай терімен келген марапат.
Айнұр Мұхамеджанқызы өзі де кәсіби шеберлігін шыңдаудан ешқашан қол үзген емес. Педагогтарға арналған республикалық олимпиадада І орын алуы, халықаралық және республикалық ғылыми-әдістемелік жобалардағы белсенділігі, Л.Н.Гумилев атындағы Еуразия ұлттық университетінің әдістемелік семинарларына қатысуы – оның ізденісті өмір салтына айналдырғанының дәлелі.
Әсіресе бүгінгі цифрлық дәуірде жасанды интеллект мүмкіндіктерін оқу үдерісіне тиімді енгізуге арналған аудандық семинардағы белсенділігі – оның заман көшінен қалмай, білім берудің жаңа бағыттарын еркін меңгерген жаңашыл ұстаз екенін көрсетеді.
Ұстаздың еңбегі дипломдармен өлшенбейді. Диплом – еңбектің көрінісі ғана. Нағыз марапат – шәкіртінің сенімі, ата-ананың алғысы, әріптестің құрметі. Айнұр Мұхамеджанқызы осы үш биікті де бағындырған жан.
Оның өмірлік ұстанымы – «Ізденген ұстаз ғана ізденетін шәкірт тәрбиелейді». Сондықтан әрбір сабағы – жаңалыққа толы, әрбір күні – ізденіске толы еңбек. Ол үшін мектеп – жұмыс орны емес, рухани әлемі, шәкірттері – жай ғана оқушы емес, елдің ертеңі.
Қазақ халқы «Жақсы мұғалім – мектептің жүрегі» дейді. Расында да, мектептің тынысын ұстап тұрған жүрек болса, сол жүректің бір соғысы – Айнұр Мұхамеджанқызының адал еңбегі. Оның қарапайым қалпының өзінде үлкен парасат, үнсіз еңбегінің өзінде үлкен ерлік жатыр.
Ұстаздық – мәңгілік мамандық. Ал мәңгілік мамандықты жүрекпен таңдаған адам ғана уақыттың сынынан сүрінбей өтеді. Мұхамеджанқызы Айнұр – сондай тұлғалардың бірі. Ол білімнің бағбанындай әр шәкірттің бойындағы қабілет дәнін баптап, оның жемісін қоғам игілігіне айналдырып келеді.
Ел ертеңін тәрбиелеу – ең қасиетті аманат. Сол аманатқа адалдық танытып жүрген ұстаздың еңбегі бүгін де бағалы, ертең де қадірлі болмақ. Себебі оның еккен білім дәні ертең ел игілігіне айналар саналы ұрпақтың бойынан көктеп шығады. Ұстаздың шынайы бақыты да, мәңгілік мұрасы да – сол.
Айзере Құлжанова,
Қызылорда облысы