Математика – жай ғана сандар мен формулалардың жиынтығы емес. Ол – логика мен парасаттың, терең ойлау мен ізденістің ғылымы. Осындай күрделі пәннің қыр-сырын шәкірт жүрегіне жеткізіп, білім саласында отыз жылдан астам уақыт бойы абыройлы еңбек етіп келе жатқан педагог-зерттеуші, білікті ұстаз Меруерт Жалдықарақызы Таласбаеваның еңбек жолы – бүгінгі жас мамандар үшін тағылымы мол өнеге.
Өмір жолы және алғашқы қадамдар
Меруерт Жалдықарақызы 1969 жылдың 1 желтоқсанында Қызылорда облысы, Жаңақорған ауданының Аққұм стансасында дүниеге келген. Білімге деген құштарлығы оны Қызылорда қаласындағы педагогикалық институтқа жетелеп, 1994 жылы математика және информатика пәндерінің мұғалімі мамандығын табысты тәмамдайды.
Еңбек жолын Ақжол ауылындағы №196 орта мектепте бастаған жас маман алғашқы күннен-ақ өз ісіне жауапкершілікпен қарап, шәкірт тәрбиелеуді өмірлік мұратына айналдырды. Бүгінде ол Қызылорда облысы, Жаңақорған ауданының Қыраш ауылындағы №180 орта мектепте табысты еңбек етіп, саналы ғұмырын білім саласына арнап келеді.
Инновациялық ізденіс – жетістік кепілі
Меруерт Таласбаева – үздіксіз ізденісті өмірлік ұстанымына айналдырған ұстаздардың бірі. Ол тек сабақ берумен ғана шектелмей, математиканы оқытудың тиімді әдістерін жетілдіруге де ерекше көңіл бөледі.
2024 жылы жарық көрген «ҰБТ-дағы математикалық тапсырмаларды шешудегі құпиялар» атты авторлық бағдарламасы республика көлемінде тәжірибеге енгізіліп, талапкерлердің білім сапасын арттыруға өз үлесін қосты. Бұл еңбек бүгінде ҰБТ-ға дайындалушы көптеген оқушы үшін құнды әдістемелік құралға айналған.
Ұстаздың қажырлы еңбегі мемлекет тарапынан да жоғары бағаланып келеді. 2021 жылы Қазақстан Республикасы Білім және ғылым министрінің Құрмет грамотасымен марапатталса, 2024 жылы республикалық «Ең үздік математик» байқауында І орын иеленіп, кәсіби шеберлігінің биік деңгейін дәлелдеді.
Шәкірт жетістігі – ұстаз мерейі
Нағыз ұстаздың ең үлкен жетістігі – шәкіртінің табысы. Меруерт Жалдықарақызы тәрбиелеген оқушылар түрлі білім додаларында топ жарып, мектеп мерейін үстем етіп келеді.
Атап айтқанда:
• Серікбай Каусар – 2024 жылғы «Алтын түлек» олимпиадасының және 2025 жылғы аудандық пәндік олимпиаданың жүлдегері;
• Бауыржанұлы Нұрбақыт – 2025 жылғы «Алтын түлек» олимпиадасының жеңімпазы әрі 2026 жылғы ғылыми жобалар байқауының жүлдегері;
• Әліпбай Абылай мен Әбдібек Сүндет – 2024–2025 оқу жылындағы «Алтын сақа» олимпиадасының үздіктері.
Сонымен қатар, «Кенгуру», «Ақбота» секілді халықаралық зияткерлік сайыстарда да оның шәкірттері жыл сайын жоғары нәтижелер көрсетіп келеді.
Өнегелі отбасы, аяулы ана
Ұстаздық – білім берумен қатар, үлкен жүрек жылуын талап ететін мамандық. Меруерт Жалдықаразы мектеп қабырғасында ғана емес, отбасында да үлгілі жан. Ол – төрт баланың аяулы анасы.
Аналық мейірім мен ұстаздық талапты үйлестіре білген жанның басты бақыты – шәкірттерінің жетістігін көру. Оның тәрбиесін көрген көптеген түлек бүгінде әртүрлі салада ел игілігі үшін еңбек етіп жүр.
«Мұғалім – өзгенің бақытын аялап, өзінің уақытын аямайтын адам» деген қанатты сөз дәл осындай жандарға арналғандай.
Ұстаз еңбегінің жемісі
Бүгінде Меруерт Жалдықарақызы тәрбиелеген шәкірттердің бірқатары өз ұстазының жолын таңдап, еліміздің әр өңірінде білім шырағын жағып жүр. Бұл – нағыз ұстазға тән ұлы мұраттың орындалуы, ұзақ жылғы еңбектің жемісі.
Өз ісіне адалдық пен жауапкершілікті серік еткен Меруерт Таласбаева сынды ұстаздар барда қазақ білімінің болашағы жарқын болары сөзсіз. Ұстаздың өмір жолы – білімге адалдықтың, еңбексүйгіштіктің және шәкірт жүрегіне жол таба білудің жарқын үлгісі.
АЙЗЕРЕ ҚҰЛЖАНОВА
ҚЫЗЫЛОРДА