Сыр өңірінің қасиетті топырағында, абыз атымен аталған Бала би ауылында, үлкен бір әулеттің ғана емес, тұтас бір мектептің анасына, ақылшысына айналған ізгі жан бар. Ол — Жанкушева Райхан Серікбайқызы.
Өмірдің сан түрлі белестерінен өтіп, отыз алты жыл бойы мектеп қабырғасында үзіліссіз еңбек еткен, бүгінде «Педагог-зерттеуші» шыңына шыққан аяулы ұстаздың жүріп өткен жолы — адалдық пен табандылықтың шынайы дастан іспетті. Райхан Серікбайқызы 1970 жылдың жайма-шуақ жазында, 20 маусымда дүние есігін ашты. Оның балалық шағы Сырдың самалымен, ауылдың қоңыр тіршілігімен астасып өтті. Әкесі Серікбай Иғамбердіұлы мен анасы Орынша Әлитанқызы өмір бойы совхозда мал шаруашылығымен айналысқан, еңбектің нанын адалынан жеген қарапайым жандар еді. Бойжеткен Райхан анасының мейірімі мен әкесінің ұлағатты тәрбиесін көріп өсті. Сұрапыл тіршіліктің қиындығына төзе білген асыл анасы 2020 жылы мәңгілік мекеніне аттанса да, оның қалдырған өнегесі Райханның жүрегінде шамшырақ болып жанып тұр. 1977 жылы өзі туған ауылдағы №50 Абай атындағы орта мектептің табалдырығын аттаған кішкентай қыз, арада он жыл өткенде сол алтын ұяны үлкен армандармен бітіріп шықты. Оның тағдыры, болашағы мен бүкіл ғұмыры осы білім ордасымен мәңгілікке байланысатынын ол кезде ешкім де болжай алмаған еді…
Сатылап өскен саналы ғұмыр
Үлкен өмірге қадам басқан Райхан Серікбайқызы еңбек жолын дәл осы өзі бітірген №50 Абай атындағы орта мектепте химия пәнінің лаборанты болудан бастады. Мектептің қоңырау дауысы, балалардың күлкісі оның жанына ерекше қуат берді. Көп ұзамай ол аға пионер вожатыйы болып, оқушылардың белсенді өмірінің ұйытқысына айналды. Білімге деген құштарлық оны тоқтатқан жоқ. Ол жұмыс істей жүріп: 1998 жылы Оңтүстік Қазақстан Ашық университетіне оқуға түсті. 2001 жылы Қарағанды қаласындағы Ресей-Қазақстан Қазіргі заманғы гуманитарлық университетін «Қазақ тілі мен әдебиеті мұғалімі, филолог-оқытушы» мамандығы бойынша табысты тәмамдады.Сөз құдіретін түсінген филолог маманның ұйымдастырушылық қабілеті ерте байқалды. 2002 жылдың қазан айында ол мектеп директорының оқу ісі жөніндегі орынбасары болып тағайындалса, 2005 жылдан бүгінгі күнге дейін мектептің тәрбие ісін өрге сүйреп, директордың тәрбие ісі жөніндегі орынбасары қызметін абыроймен атқарып келеді. Отыз алты жыл! Бұл — бір мектептің тарихы, мыңдаған шәкірттің тағдыры жатқан үлкен кезең.
Ғибратты ізденіс пен кәсіби биіктік
Райхан Серікбайқызы — уақыт көшінен қалмай, үнемі өзін-өзі дамытып отыратын жаңашыл басшы. Ол «Тиімді оқыту», «Педагогикалық менеджмент», «Цифрлық құзыреттілік» секілді заманауи курстардан өтіп, білімін ұштап отырады. Оның қаламынан туған «Мектептегі тәрбие жұмысын жаңа форматта ұйымдастыру» атты әдістемелік көмекші құралы бүгінде көптеген жас мамандардың үстел үсті кітабына айналған. Оның «Жасөспірімдерге рухани-адамгершілік тәрбие беру» секілді мақалалары республикалық ғылыми басылымдарда, «Білім және инновация» журналында және «Ustaz tilegi» порталында үздіксіз жарияланып, көпке үлгі болуда.
Еңбектің еленген сәттері:
Педагогтың ерен еңбегі 2020 жылы республикалық «Үздік педагог» медалімен, «Шығармашыл ұстаз» төсбелгісімен, Облыс әкімінің, ҚР Орталық сайлау комиссиясының және Аудан әкімінің Алғыс хаттарымен жоғары деңгейде ұлықталды. Ол — өнерден де кенде емес, облыстық «Наурыз шапағаты» фестивалінің көпжылдық лауреаты.
Шаңырақтың шырайы мен қоғамдық парыз
Райхан Серікбайқызы — тек білікті маман ғана емес, ауылдың саяси-қоғамдық өмірінде де салмағы бар тұлға. Ол көп жылдан бері Бала би ауылындағы №273 учаскелік сайлау комиссиясының төрағасы қызметін атқарып, халықтың сенімін ақтап келеді. Үлкен қызметтің тұтқасын ұстап отырса да, ол — шаңырағының алтын діңгегі. Ардақты ананың ұлы Мардан да ана жолын қуып, білім саласында қызмет етсе, келіні Айымжан — үй шаруасында, әулеттің берекесін кіргізіп отырған ақжаулықты келін. Бүгінде кейіпкеріміз 5 немеренің аяулы әжесі. Немерелерінің алды мектепте, кішісі балабақшада ата-әже өнегесін көріп өсіп келеді.
Қорыта айтқанда мағыналы ғұмырдың, адал еңбектің шынайы бейнесін көргіңіз келсе, Бала би ауылындағы №50 мектепке барыңыз. Онда жүрегі жылы, жүзі жарқын, шәкіртін өз баласындай аялаған Райхан Серікбайқызы қарсы алады. Оның өмірі — ұстаздық етудің ғана емес, адам болудың, елге қызмет етудің нағыз көркем оқулығы.
Жансая НҰРҚОЖА
Қызылорда облысы